Marelize Maré
Daar is toenemende kommer oor die hoë aantal tieners wat oor die feestyd geboorte geskenk het.
Dít volg nadat die Departemente van Maatskaplike Ontwikkeling en Gesondheid onderskeidelik berig het dat 21 babas op Nuwejaarsdag in die Oos-Kaap aan tieners tussen die ouderdomme van 15 en 19 jaar gebore is.
Statistiek Suid-Afrika het aangeteken dat meer as 100 000 baba’s vir moeders van 19 jaar en jonger tussen 1 Januarie 2024 en 28 Februarie 2025 gebore is.
Die Embrace Movement for Mothers-organisasie se woordvoerder, Nonkululeko Mbuli, sê dit is ’n enorme bron van kommer wat dringend die hoof gebied moet word.
Die organisasie One to One Africa het ook statistiek uitgelig wat toon dat meer as 90 000 tieners in 2024 geboorte geskenk het.
Die syfers toon verder dat meer as 2 000 van hierdie geboortes by meisies tussen die ouderdomme van 10 en 14 voorgekom het.
Die Teddy Bear Clinic, ’n organisasie wat werk om minderjariges teen mishandeling en uitbuiting te beskerm, se direkteur, Shaheda Omar meen dat die krisis ’n bewys is van diepgewortelde maatskaplike ongeregtighede.
Sy sê navorsing word tans gedoen om owerhede te help bepaal wat gedoen moet word om die krisis in die kiem te smoor.
Fotokrediet: Unsplash/CC0 Public Domain
