1 Februarie 2025
Die musiekagentskap, Coleske Artists, sê in ‘n verklaring hy treur oor die dood van die liedjieskrywer, Johan Oberholzer.
Hy is volgens die agentskap, vroeër vandag aan natuurlike oorsake oorlede.
Hy het onder andere “Die Land”, “Mis Eet Slaap Herhaal” deur Demi-Lee Moore, “Foto’s” deur Dodo Nyoka, “Skildery” deur Nadine, “Af en Af” van Kurt Darrem en “Laaste Asem” geskryf. ‘n Nuwe liedjie van Laurika Rauch, “Nog voor ek jou geken het” is ook deur Oberholzer geskryf.
Talle musikante het reeds hulde aan hom gebring. “Johan se musiek het die klank en identiteit van Afrikaanse musiek help vorm en sy invloed sal vir altyd voortleef. Sy liedjies het nie net gehore betower nie, maar ook kunstenaars gehelp om hul eie stemme te vind en hul loopbane te bou,” sê Coleske.
Een van die bekende Afrikaanse kunstenaars vir wie Oberholzer liedjies geskryf het, Dirk van der Westhuizen, het in ‘n boodskap van medelye op sy sosialemediaplatforms Oberholzer se dood as ‘n bitter hartseer dag in die Afrikaanse musiekbedryf beskryf. Oberholzer het onder meer sy treffers Sexy Vi My en Stoom geskryf.
Tertius Pretorius, Pretoria FM se musieksamesteller sê Johan was ‘n formidabele liedjieskrywer en vervaardiger en kon enige musiekgenre bemeester. “Met meer as 100 nommer-1-treffers uit sy pen het die Afrikaanse musiekbedryf vandag ‘n reus verloor.”
.
