’n Nuwe strategie is voorgestel om die Johannesburg-metro se multi-miljardrandse skuld aan Eskom te takel.
Die minister van elektrisiteit en energie, Kgosientsho Ramokgopa, het saam met die burgemeester van Johannesburg, Dada Morero, en die uitvoerende hoof van Eskom, Dan Marokane, ’n ooreenkoms bemiddel om volhoubare kragvoorsiening in die Goudstad te verseker.
Die kragverskaffer het vroeër gewaarsku dat hy die toevoer na dele van Johannesburg gaan onderbreek, indien die metroraad nie minstens R5 miljard van sy agterstallige skuld betaal nie.
Die toekomstige betalingsraamwerk is grootliks gegrond op die oormerk van finansiële bates, wat sal verseker dat kraginkomste streng beheer en uitsluitlik vir betalings aan Eskom aangewend sal word.
Morero het erken dat swak skuldinvordering vroeëre betalingsooreenkomste skipbreuk laat ly het.
