President Cyril Ramaphosa gaan na verwagting in Junie tydens ’n Afrika-Unie-vergadering in Egipte ’n kontinentale migrasie-ooreenkoms ter tafel lê.
Volgens die ANC se sekretaris-generaal Fikile Mbalula sal die voorstel ’n raamwerk skep om ongedokumenteerde migrasie gesamentlik oor Afrika heen te hanteer.
Hy sê Suid-Afrika word deur ’n veiligheidsrisiko in die gesig gestaar, weens mense wat onwettig die land binnekom en misdade uitvoer.
Hy het ook beklemtoon dat hoewel Suid-Afrikaners die reg het om oor immigrasie te betoog, moet dit binne die raamwerk van die wet plaasvind.
Ministers het Maandag by die Uniegebou met politieke partye en verskeie groeperings vergader om onder meer ’n nasionale aksieplan op te stel.
Honderde migrante kamp intussen buite die departement van binnelandse sake se kantore in Durban, te midde van onsekerheid oor dreigemente dat hulle die land teen 30 Junie moet verlaat.
Die groep bestaan uit mans, vroue en kinders en het aan die nuusdiens, IOL, gesê hulle vrees geweld gaan uitbreek indien hulle op 30 Junie nog in die land is.
Meer as 80 000 buitelanders wag ook nog om te hoor of Suid-Afrika aan hulle asiel sal verleen.
Asiel is reeds aan altesaam 55 190 vlugtelinge toegestaan.
