Die regstryd oor die uitlewering van beskuldigde misdadigers uit die buiteland na Suid-Afrika gaan môre in die konstitusionele hof voort.
Die Nasionale Vervolgingsgesag nader reeds vir dekades ander lande om beweerde misdadigers na Suid-Afrika uit te lewer om voor die hof te verskyn.
Volgens die appèlhof lê die mag om só ’n versoek te rig egter by die minister van justisie.
In Desember verlede jaar het die appèlhof beslis dat die NVG die mag van die Uitleweringswet van 1962 oorskry het.
Dít beteken dat alle uitleweringsversoeke wat deur die NVG gemaak is, nou as ongeldig betwis kan word.
Die uitspraak van die appèlhof word nou in die konstitusionele hof hersien, wat moet besluit of dit van krag bly en of dit terugwerkend van toepassing is op alle vorige versoeke.
Indien teen die NVG beslis word, kan talle beweerde misdadigers wat buite Suid-Afrika se landsgrense is aan regspraak ontkom.
