Verslag: “SEB dwing SA ekonomie op sy knieë”

‘n Verslag oor die monetêre waarde van skade – wat deur Suid-Afrika se beleid van breedgebaseerde swart ekonomiese bemagtiging (B-BSEB) veroorsaak word – is pas vrygestel.

Dié verslag is vanoggend gesamentlik deur die Vryemarkstigting en die Solidariteit Navorsingsinstituut (SNI) uitgereik.

Volgens die SNI dien die verslag ook as gevraagde en tydige kritiek op president Cyril Ramaphosa se onlangse uitlating dat SEB-beleid nodig is en nié ekonomiese groei in Suid-Afrika belemmer nie.

Volgens die verslag beloop die jaarlikse koste van nakoming van SEB tussen R145- en R290-miljard. Dit verteenwoordig 2- tot 4% van Suid-Afrika se bruto binnelandse produk (BBP).

Hierdie las op ekonomiese groei lei tot ʼn jaarlikse aftakeling van 1,5- tot 3% in BBP-groei, en tot ʼn jaarlikse verlies van tussen 96 000 en 192 000 werksgeleenthede.

“Hierdie yslike ekonomiese koste is nie bloot die gevolg van nalatigheid of die blote swak toepassing van ʼn plan nie. Dit is doelbewuste regeringsbeleid wat dit veroorsaak,” sê Theuns du Buisson, ekonomiese navorser van die SNI, en mede-opsteller van die verslag.