AfriForum eis ‘n verduideliking van die Suid-Afrikaanse Uitsaai-korporasie (SAUK) nadat die Afrikaanse TV-nuusbulletin nie die afgelope Saterdagaand, 5 April ,soos gebruiklik om 18:15 op SABC2 uitgesaai is nie.
AfriForum se hoof van kultuursake, Alana Bailey, sê die SAUK het nog geen verduideliking hiervoor gegee nie, en meen kykers is ontsteld oor die “minagting van die Afrikaanse gehoor se toegang tot nuus.”
Sy sê die organisasie is reeds sedert Augustus 2024 in gesprek met die openbare uitsaaier weens die verandering in tydsgleuwe van die Afrikaans nuusbulletins.
“Afrikaanse verbruikers is lojaal en kapitaalkragtig. Sowat ’n derde van die mark is Afrikaans. Dit maak dit nog meer onverstaanbaar dat die SAUK kies om hierdie mark te vervreem. Die SAUK kies spreekwoordelik om ’n gans te slag wat goue eiers lê,” sê Bailey.
Sy sê AfriForum wag op ’n verduideliking oor Saterdag se gebeure en moniteer intussen die situasie om seker te maak dat verdere onderbrekings nie plaasvind nie.
