Die hooggeregshof in Pretoria het bevind dat president Cyril Ramaphosa se besluit – om die Wet op Nasionale Gesondheidsversekering te onderteken – op hersiening geneem kan word.
Dié uitspraak kom nadat die Raad van Gesondheidsfinansiers (BHF) die president se besluit – om dié wet te onderteken – voor die hof gedaag het.
Die hof het Ramaphosa opdrag gegee om die rekord van besluitneming binne 10 dae aan die raad te verskaf.
Die president en die minister van gesondheid is gelas om die koste van dié aansoek te betaal.
Intussen het Solidariteit die uitspraak verwelkom. Die netwerköordineerder van die mediese beroepe by Solidariteit, Peirru Marx sê die vakbond is verheug oor hierdie uitspraak.
“Dit is ‘n belangrike uitspraak en dit strook sonder twyfel met ons hofsaak waarin ons aanvoer dat die NGV-wet in sy totaliteit ongrondwetlik, onwettig en irrasioneel is,” het Theuns du Buisson, ekonomiese navorser van Solidariteit Navorsingsinstituut, gesê.
