Orkaan Melissa het in Kuba aangekom en is as ’n Kategorie 3-storm geklassifiseer.
Die Amerikaanse Nasionale Orkaansentrum sê sterk winde van tot 193-kilometer per uur het die suidkus van die land getref.
Orkaan Melissa is as een van die kragtigste orkane in die Atlantiese Oseaan bestempel en het gisteraand verwoesting in Jamaika gesaai.
Die burgemeester van Montegobaai sê dat die een helfte van die stad in die noordweste van Jamaika deur vloedwaters van die ander kant afgesny is.
Die premier van Jamaika, Andrew Holness, het gister die eiland tot ’n rampgebied verklaar.
Hy sê daar is skade aan hospitale en verskeie eiendomme aangerig, nadat swaar reën tot oorstromings gelei het.
Melissa sal waarskynlik noordoos beweeg, die Bahamas later vandag kruis en daarna môre Bermuda bereik.
Die Nasionale Orkaansentrum sê dat Melissa effens verflou het tot ’n Kategorie 3-storm, met maksimum volgehoue winde van tot 205 kilometer per uur.
