Die Gautengse LUR vir onderwys, Lebogang Maile, sê strafregsake sal geopen word teen persone wat by beweerde korrupsie in openbare skole betrek word, en dat die verantwoordelikes vervolg sal word.
’n Interne ondersoek het 41 gevalle van beweerde korrupsie, bedrog, finansiële wanbestuur en verkrygingsonreëlmatighede tussen 2023 en Junie vanjaar geïdentifiseer.
Dit sluit skoolhoofde, beheerliggaamlede, finansiële beamptes en onderwysers in.
Die departement sê die wanbestuur ontneem leerlinge van basiese noodsaaklikhede soos kos, handboeke en meubels, met bewerings dat selfs skoolvoedingsprogramme en skoolvoorraad gesteel word.
Daar is ook bevind dat sekere skole moontlik onverklaarde inkomste uit onder meer verhurings en skenkings het.
