Die veroordeelde misdaadbaas, Radovan Krejcír, gaan na verwagting ‘n aansoek ingevolge Artikel 342A van die Strafproseswet in die Palm Ridge-landdroshof indien.
Volgens ‘n mediaverklaring wat namens Krejcir deur sy regsverteenwoordigers uitgereik is, voer hy aan dat daar onredelike vertragings in sy hofsake was en dat sy menseregte geskend word.
Krejcir, wat tans sy vonnis in die C-Max-afdeling van die Kgoshi Mampuru-gevangenis uitdien, beweer hy word onder meer nie voldoende toegang tot gesondheidsorg en ander geriewe gegun nie.
Die verklaring lui verder dat Krejcir, nadat hy na bewering alle ander regsopsies uitgeput het, homself in die verrigtinge sal verteenwoordig en sy saak teen die staat sal stel.
Die aansoek sal na verwagting in die Palm Ridge-landdroshof aangehoor word.
