Gunther von Below
Die première van Crossed Out – Confronting Persecution in South Africa het ’n ongemaklike gesprek oor Suid-Afrika se verlede, hede en toekoms laat ontstaan.
Die dokumentêr kyk na die land se geskiedenis en huidige politieke landskap vanuit die perspektief van minderheidsregte vir Afrikaners.
Een van die dokumentêr se hoofargumente is dat Suid-Afrika se diversiteit nie net oor taal gaan nie. Die land bestaan uit verskillende gemeenskappe, elk met hul eie geskiedenis, kultuur en behoeftes. Suid-Afrika se politieke mag is te sentraal en gemeenskappe behoort meer ruimte te hê om besluite oor hul eie toekoms te neem.
Die film se sterkste oomblikke is egter die persoonlike getuienisse van mense wat plaasaanvalle oorleef het. Een slagoffer vertel hoe ’n aanvaller “Kill the Boer” geskree het voordat hy haar met ’n stuk staal oor die kop geslaan het. Sulke getuienisse bring ’n politieke debat wat maklik abstrak kan raak, baie nader aan mense se geleefde werklikheid.
Die dokumentêr kyk ook na politieke leiers se gebruik van omstrede slagspreuke. Daar word onder meer verwys na Nelson Mandela en Jacob Zuma se gebruik van liedjies wat na die doodmaak of skiet van boere verwys, asook Julius Malema se “Kill the Boer”. Die film vra waar die grens tussen vrye politieke uitdrukking en aanhitsing tot geweld getrek moet word.
Nog ’n deel van die film fokus op swart ekonomiese bemagtiging. Advokaat Mark Oppenheimer bespreek onder meer die moontlike implikasies van streng rasseverteenwoordiging in die werksplek. Die dokumentêr vra ook wie werklik ekonomies voordeel trek uit beleide wat bedoel is om histories benadeelde Suid-Afrikaners te bemagtig.
Die film wys verder op Afrikanergemeenskappe soos Filadelfia, waar mense probeer om minderbevoorregte Afrikaners te help. Die besturende direkteur beskryf dit as ’n voorbeeld van gemeenskappe wat self oplossings probeer vind waar hulle meen die staat nie genoeg doen nie.
Roets sê verder dat Crossed Out nie probeer om Suid-Afrika se probleme as eenvoudig voor te stel nie.
“Die boodskap is eerder dat ’n land met soveel verskillende gemeenskappe moontlik nuwe maniere moet vind om mag te versprei en mense se reg op taal, kultuur en waardigheid te beskerm.”
Die dokumentêr is tans nog nie vir die publiek beskikbaar nie, maar sal na verwagting teen die einde van September vrygestel word.
Crossed Out – Confronting Persecution in South Africa sal binnekort op Lex Libertas se platforms beskikbaar wees.
Lees meer berigte in dié uitgawe van Nuusweek – https://www.pretoriafm.co.za/wp-content/uploads/2026/09/NUUSWEEK-Uitgawe-84-18-Sept-2026-1.pdf
