Die voormalige president Jacob Zuma gaan aansoek doen om verlof tot appèl teen ’n beslissing van die Hooggeregshof in Pietermaritzburg wat bepaal dat die uitgerekte Wapentransaksie-verhoor aanstaande jaar moet voortgaan.
Zuma en die Franse wapenvervaardiger, Thales staan tereg op korrupsieklagte wat verband hou met die omstrede wapentransaksie van 1999.
Die hof het beslis dat die verhoor op 1 Februarie aanstaande jaar begin.
Zuma en Thales voer aan dat verskeie sleutelgetuies reeds oorlede is en dat dit ’n regverdige verhoor onmoontlik maak.
Die Jacob Zuma-stigting sê die uitspraak bevat ernstige feite-foute en dat daar ‘n goeie kans is dat ’n hoër hof dit kan omkeer.
Zuma probeer intussen steeds om staatsaanklaer Billy Downer uit die saak te laat verwyder.
