Die Wes-Kaapse Hooggeregshof hoor vandag en môre President Cyril Ramaphosa se dringende aansoek om die parlementêre vervolgingsproses tydelik op te skort.
Ramaphosa voer aan dat die proses moet wag totdat die hof sy aansoek om die onafhanklike paneel se verslag te hersien, afgehandel het.
Die voorsitter van die parlementêre vervolgingskomitee, Makashule Gana, sê die aansoek kan die komitee se werk vir jare vertraag en die Parlement se grondwetlike pligte belemmer.
Die EFF, MK-party en UAT voer aan dat die president self die dringendheid van die saak geskep het en vra dat die aansoek van die hand gewys word.
Die komitee vergader na verwagting aanstaande week om ‘n getuienisleier aan te wys.
