Die DA-leier, Geordin Hill-Lewis, eis dat president Cyril Ramaphosa dringend ’n minister van polisie vas moet aanstel.
Hy sê dat Firoz Cachalia reeds nou al ’n jaar lank in die pos waarneem, nadat Senzo Mchunu geskors is.
Volgens Hill-Lewis is misdaad ’n nasionale krisis en kan daar nie onsekerheid in die leierskap van die polisiediens wees nie.
Dié DA-leier sê as vennoot in die Regering van Nasionale Eenheid (RNE) vra die party dat die persoon wat aangestel word ’n permanente mandaat kry om onder meer misdaadintelligensie op te bou, sigbare polisiëring te versterk, en om dissipline in die polisie te herstel.
“Ons kan nie permanente misdaad met tydelike ministers en tydelike polisieleierskap bekamp nie,” het Hill-Lewis gesê. “Ons het ’n permanente polisieminister nodig … nou!”.
Hill-Lewis sê dat die salaris wat aan ’n tweede minister van polisie betaal word, gebruik kan word om meer polisiebeamptes te befonds.
Volgens hom kan die R2,8 miljoen wat tans aan ’n bykomende minister bestee word, eerder agt nuwe speurders finansier om geweldgeteisterde buurte te beveilig.
“Suid-Afrika moet elke gebroke skakel in die strafregsketting herstel. Ons moet misdadigers vang deur professionele polisiëring, speurders en intelligensie. Ons moet hulle skuldig bevind deur middel van dossiers, forensiese ondersoeke en aanklaers. En ons moet die polisie opruim deur die misdadigers uit die SAPD te kry sodat die SAPD die misdadigers van ons strate af kan kry. Vang. Veroordeel. Skoonmaak.”
