Die jaarlikse verbruikersprysinflasie het in September tot 3,4% gestyg. Dit is effens hoër as die koers van 3,3% vir Augustus.
Die koers is die tweede hoogste inflasiekoers vir die jaar, ná die hoë inflasie van 3,5% in Julie.
Volgens Statistiek Suid-Afrika is die verhoging deur hoër pryse in verskeie kategorieë, veral in die vervoersektor, gedryf.
SSA sê egter voedsel en niealkoholiese drank, tabak, meubelment, huishoudelike toerusting en roetine-onderhoudswerk het laer koerse aangeteken.
Vleis en mieliemeel se pryse het hoog gebly, terwyl die prys van produkte soos melk, eiers en wit rys gedaal het.
