Europese hof beslis dat Caster Semenya nié voorheen ‘n regverdige verhoor gekry het nie

Die Europese Hof vir Menseregte het bevind dat die Suid-Afrikaanse atleet, Caster Semenya (34), se verhoor in ‘n Switserse hof nié regverdig was nie.

Die saak hou verband met Semenya se voortslepende geveg met Wêreld Atletiek oor haar testosteroonvlakke. Sy word sedert 2018 verbied om in die 800 meter atletiek-item deel te neem omdat sy weier om medikasie te neem wat haar testosteroonvlakke sal verlaag.

LEES OOK: Caster Semenya se saak oor testosteroonvlakke hervat in Menseregtehof

Die Europese Hof se beslissing verander egter nie Wêreld Atletiek se beleid oor haar deelname nie. Sy mag nogsteeds nie deelneem as sy nie medisyne neem nie. Die Switserse hof is ingevolge die beslissing verplig om Semenya €80 000, sowat R1,6-miljoen te betaal vir haar regskostes.

Semenya het die beslissing verwelkom en sê sy hoop dat atlete, in ‘n soortgelyke situasie, beter beskerm sal word en dat die atlete se regte beskerm sal word.

LEES OOK: Alle vroue-atlete sal voortaan DNS-toetse moet ondergaan voordat hulle mag deelneem

“Die geveg sal nooit verby wees solank as wat daar onreg geskied nie.” Semenya het in 2012 en in 2016 die goue medalje gewen vir die 800m by die Olimpiese Spele.