Alle vroue-atlete sal voortaan DNS-toetse moet ondergaan voordat hulle mag deelneem

Wêreldatletiek het bekend gemaak dat daar voortaan DNS-toetse van deelnemers in die vroue-kategorieë sal wees.

Die beheerliggaam van alle baan- en velditems – sowel as padwedlope – sê daar is op dié stap besluit om vroue-atlete en die integriteit van vroue-items te beskerm.

Atlete sal aan ‘n eenmalige wangdepper- of droëbloedtoets onderwerp word as deel van ‘n proses wat as nie-indringend beskou word.

Die organisasie het nie ‘n tydlyn vir die inwerkingstelling hiervan uitgereik nie, maar hoop om dit betyds in te stel vir die buitelug-wêreldkampioenskappe in Tokio – later vanjaar.

Die president van Wêreldatletiek, Sebastian Coe sê die toetse sal vir alle vroue atlete die nodige selfvertroue gee om in hulle kategorie deel te neem.

Dié beleid sal na verwagting uit verskeie oorde voor die hof gedaag word, maar Coe is hoopvol dat dit elke keer sal slaag.

Die beleid het ‘n direkte uitwerking op transgender vroue, of vroue soos Suid-Afrika se Caster Semenya.