Politieke partye, insluitend die EFF en die MK-party, eis die minister van finansies, Enoch Godongwana se bedanking nadat hy toegegee het en die beplande BTW-verhoging geskrap het.
Die EFF het die begroting as roekeloos beskryf, en gesê die minister het nie die erns van die land se ekonomiese krisis in ag geneem nie. Die EFF het saam met die DA ‘n dringende aansoek by die hof ingedien in ‘n poging om die verhoging stop te sit.
Die MK-party het die ommekeer as ‘n vernederende stap vir die Regering van Nasionale Eenheid beskou. Beide partye beskou die aanvanklike planne as onwettig en ongrondwetlik.
Ingevolge Godongwana se oorspronklike begroting sou BTW in die huidige boekjaar met 0,5% verhoog, gevolg deur ‘n verdere 0,5% in die volgende boekjaar.
Ná Godongwana se aankondiging het sommige ontleders aangevoer dat Godongwana se pos in die kabinet moontlik in gedrang kan wees met dié stap en dat daar nou ander maniere gevind sal moet word om die begroting te laat klop.
