President Cyril Ramaphosa het die salarisse van openbare ampsdraers in verskillende kategorieë met tussen 3,5% en 4% verhoog.
Die verhoging van 3,5% is van toepassing op lede van die nasionale uitvoerende gesag, lede van die Nasionale Vergadering en permanente afgevaardigdes na die Nasionale Raad van Provinsies.
Dit geld óók vir premiers, lede van provinsiale uitvoerende rade en lede van provinsiale wetgewende liggame. Regters van die Konstitusionele hof, regters in ander howe asook landdroste kry ’n salarisverhoging van 4%.
Die salarisse van lede van die onafhanklike grondwetlike instellings sal ook met 4% styg.
Die woordvoerder van die presidensie Vincent Magwenya sê die besluit volg op aanbevelings deur die Onafhanklike Kommissie vir die Besoldiging van Openbare Ampsdraers.
