Esmarie Yssel
Die Britse sanger en liedjieskrywer, Chris Rea, is in die ouderdom van 74 oorlede.
Sy vrou en twee kinders het in ’n mediaverklaring gesê hy is ná ’n kort siekbed tuis oorlede.
Hy is in 2001 met pankreaskanker gediagnoseer, maar sy pankreas is tóé verwyder.
Rea is in Middlesbrough, Engeland gebore. Sy Italiaanse pa en Ierse ma het ’n roomysbesigheid besit en hy het sy rybewystoets met sy pa se roomysbussie geslaag.
Hy het in die sewentigs en tagtigs bekendheid verwerf met treffers soos Fool (If You Think It’s Over) en Let’s Dance.
Sy eerste nommer-een-trefferalbum was in 1989 met The Road to Hell en Auberge wat in 1991 vrygestel is.
Hy het egter oor Desembers gesorg dat sy musiek oral gespeel word met Driving Home for Christmas, wat in 1986 vrygestel is.
Die lied Julia het ook menigte ouerharte geroer. Dié lied is in Oktober 1993 vrygestel as die hoofenkelsnit op sy 13de album, Espresso Logic. Die liedjie is opgedra aan sy dogter, Julia Christina, wat ten tyde van die lied se vrystelling vier jaar oud was. Die liedjie het vir vyf weke op die UK Singles-treffersparade gepronk en word vandag nog deur verskeie Suid-Afrikaanse radiostasies, insluitend Pretoria FM, gespeel.
Fotokrediet: https://commons.wikimedia.org/
