Johannesburg se uitvoerende burgemeester, Dada Morero, sê die metro gaan nie die strydbyl met Eskom opneem oor hul reusagtige skuldlas nie.
Morero het tydens sy stadsrede aangekondig dat daar eerder nou saam met die minister van elektrisiteit en energie dr. Kgosientsho Ramokgopa gewerk word om die krisis op te los.
Dit volg ná Eskom gedreig het om kragtoevoer na die goudstad te ontwrig as ’n agterstallige rekening van R5,2 miljard nie vereffen word nie.
Eskom het die Johannesburg metroraad tot 8 Julie tyd gegee om sy uitstaande skuld van R5 miljard te betaal. ’n Bedrag van R1,5 miljard is egter teen 5 Junie betaalbaar.
Eskom se hoof van kragverspreiding, Agnes Mlambo, sê die beplande onderbekings sal soortgelyk wees aan beurtkrag en op sekere tye van die dag plaasvind.
Sy sê indien die metroraad nie met ’n oplossing vorendag kom nie, sal die onderbrekings langer duur.
Volgens Morero is die munisipale skuldprobleem ’n nasionale krisis.
City Power het reeds ’n herstelplan gereed wat op nasionale riglyne gebaseer is om finansiële volhoubaarheid en bestuur in die omstrede entiteit te herstel.
