Die Suid-Afrikaanse Inkomstediens (SAID) het aangedui dat hy gereed is om die verantwoordelikheid op te neem om die inkomstegaping in die nasionale begroting aan te vul.
Dit kom in reaksie op die minister van finansies, Enoch Godongwana, se begroting wat Woensdag vir die derde keer in die Parlement ter tafel gelê is.
Godongwana het ‘n finansiële inspuiting van R7,5-miljard aan die inkomstediens toegewys in die hoop om ‘n bykomende R20- tot R50-miljard per jaar in belasting in te vorder.
Die kommissaris van die SAID, Edward Kieswetter, sê dat hulle nie daaraan dink as bykomende druk nie, maar eerder as ‘n geleentheid om die fiskale integriteit van Suid-Afrika te versterk.
Kieswetter sê die inkomstediens het ‘n oningevorderde belastingrekening van R500-miljard.
Intussen het lede van die parlement se finansiële groepering vanoggend ‘n mediakonferensie gehou na aanleiding van gister se begroting. Die voorsitter van die staande komitee oor finansies, dr Joe Maswanganyi het die bykomende geld aan die SAID verwelkom. Die R7,5-miljard sal oor die volgende drie jaar verdeel word.
Volgens hom sal die bykomende befondsing die positiewe invordering van belasting verbeter en die verouderde stelsels moderniseer. Hy sê dit bevorder ook regverdigheid binne die belastingsektor.
