Die departement van minerale hulpbronne en energie het bevestig dat brandstofpryse van Woensdag af sal afneem.
Die prys van albei grade van petrol daal met 51 sent per liter, terwyl diesel tussen 19 en 21 sent per liter goedkoper word, afhangend van die swawelinhoud.
Die groothandelprys van keroseen daal ook met 1 sent per liter en die maksimum kleinhandelsprys van LP-gas val landswyd met 61 sent per kilogram en in die Wes-Kaap met 77 sent per kilogram.
Volgens Robert Maake van die departement is die dalings te danke aan laer internasionale oliepryse en ‘n sterker rand teenoor die Amerikaanse dollar.
