Twee jong leeus wat uit die onwettige handel in wild, in Israel gered is, het ná ’n baie lang reis van nagenoeg 50 uur by die Animal Defenders International-wildreservaat in die Vrystaat aangekom.
Die 16 maande oue BenTzur en Ori is meer as ’n jaar gelede as klein welpies deur Israeliese owerhede gered nadat hulle van hul ma’s weggeneem is om as sogenaamde troeteldiere gebruik te word.
Ori is in ’n kelder gevind en BenTzur was aan ’n boom in ’n agterplaas vasgebind.
Weens die oorlog in die Midde-Ooste was vlugte skaars, maar die leeus kon uiteindelik via Kaïro en Frankfurt na Johannesburg reis.
Hulle het reeds hul nuwe habitat in die Vrystaat begin verken.
Die leeus kan weens genetiese probleme en hul geskiedenis van menslike kontak nooit in die natuur vrygelaat word nie.
