Die Verenigde Nasies se wêreldwye armoede-indeks het vir die eerste keer sedert die instelling daarvan in 2010 gestyg.
Volgens die Verenigde Nasies se Ontwikkelingsprogram leef sowat 1,2 miljard mense nou in uiterste, veelvuldige armoede.
Dit is 51,5 miljoen meer as die vorige jaar.
Meer as die helfte van dié mense is kinders wat onder meer honger ly, onderwys misloop en nie toegang tot skoon water of elektrisiteit het nie.
Die verslag waarsku egter dat bevolkingsgroei ’n belangrike faktor in die toename is, terwyl nuwe data slegs vir 13 van die 108 ontwikkelende lande beskikbaar was.
33 lande het intussen die afgelope 15 jaar die persentasie van hul bevolking wat in armoede leef, gehalveer.
Die meeste mense in uiterste armoede woon steeds in Afrika suid van die Sahara en Suid-Asië.
