’n Vrou in Noordwes was vandeesweek die jongste slagoffer van ’n plaasmoord, maar haar dood het in regeringskringe byna ongesiens verbygegaan.
Hannetjie van Zyl (55) is Maandagaand by hulle plaashek naby Ottosdal oorval en met ’n ysterpyp doodgeslaan.
Bennie van Zyl, hoofbestuurder van TLU SA, sê president Cyril Ramaphosa is absoluut afwesig as dit by plaasaanvalle en -moorde kom.
Van Zyl se aanval is die 22ste sedert Januarie vanjaar in Noordwes.
“Hier is nie ’n politieke wil as dit by plaasaanvalle en -moorde kom nie. Die vraag is: hoekom? Wanneer gaan plaasaanvalle en -moorde die politieke en veiligheidsprioriteit geniet wat die omvang en volgehoue aard daarvan vereis?”
Volgens Van Zyl was daar reeds sewe aanvalle en een moord (Van Zyl se moord) in Oktober.
“Ons praat hier van ’n absolute onsekerheidsfaktor van die grootste bate (boere) wat ’n land het. Die strategiese waarde van kos op die tafel kan nie ligtelik opgeneem word nie en ons regering negeer dit.”
Ramaphosa het die moorde van die nege vroue aan die Oos-Rand in September as ’n nasionale krisis verklaar.
Van Zyl sê die regering skep ’n klimaat waarbinne mense amper ’n groen lig kry om hierdie plaasaanvalle en -moorde te mag pleeg.
“Dis totaal onaanvaarbaar. Dit wêreld moet kennis neem. Ons sit met ’n dubbelstandaard-regering. Ons sit met ’n regering wat nie plaasaanvalle en -moorde in die praktyk aanspreek nie, terwyl hy die verantwoordelikheid het om dit te doen. Alle burgers is volgens ons grondwet gelyk en almal verdien om gelyk hanteer te word.”
Die VF Plus versoek Ramaphosa om die werklikheid van plaasmoorde nou te erken en te veroordeel.
“Wanneer die regering en president Ramaphosa weier om die omvang van plaasaanvalle te erken en dit tot ’n prioriteitsmisdaad te verklaar, faal hulle in hul primêre grondwetlike plig om alle inwoners van Suid-Afrika te beskerm.”
Agri NW sê daar moet dringend anders gedink word oor misdaad op plase.
“Daar moet ook dringend aandag gegee word aan misdaadvoorkoming en die strafregstelsel, sonder om langer diplomaties en polities korrek daaroor te probeer wees. Daarvoor is daar te veel families en gesinne wat te gereeld geruk word deur die verlies van geliefdes,” sê Naudé Pienaar, uitvoerende hoofbestuurder van Agri NW.
Lees meer berigte in dié uitgawe van Nuusweek – https://www.pretoriafm.co.za/wp-content/uploads/2026/10/NUUSWEEK-Uitgawe-87-09-Okt-2026.pdf
