6 Februarie 2025
Die Amerikaanse president, Donald Trump, het ‘n bevel onderteken om skole en atletiekorganisasies te dwing om transgender vroue van deelname aan vrouesport uit te sluit.
Die bevel, wat transgender vrouens as mans beskou, voldoen aan Trump se belofte om die sogenaamde onregverdige en gevaarlike deelname van mans in vrouesport te beëindig.
Trump sê hy beplan om befondsing te weerhou van skole waar transgender meisies in vrouesport meeding en wil die Olimpiese Komitee onder druk plaas om transgender atlete wêreldwyd uit vrouesport te verban.
Hy dreig ook om visums te weier aan transgender atlete wat aan die 2028 Olimpiese Spele in Los Angeles wil deelneem.
Swem, atletiek- en gholf-organisasies in Amerika het reeds transgender vroue verbied om deel te neem in vroue-afdelings indien hulle deur manlike puberteit gegaan het.
Die president van die Menseregteveldtog, Kelley Robinson sê die bevel gaan jong mense blootstel aan teistering en diskriminasie.
