Die vakbond, Solidariteit het in die Europese Parlement in Brussel gewaarsku dat toenemende raswetgewing, staatsverval en wat die organisasie as vyandigheid teenoor minderhede beskou, Afrikaners stelselmatig uit Suid-Afrika dryf.
Solidariteit se hoof van internasionale skakeling, Jaco Kleynhans, het tydens ’n byeenkoms van Patriots for Europe gesê ras het volgens hom weer ’n sentrale rol in staatsbeleid gekry deur wetgewing, regulasies, teikens en kwotas.
Hy het veral kritiek uitgespreek teen die gewysigde Wet op Gelyke Indiensneming, wat volgens hom voorsiening maak vir rasse-teikens in verskeie beroepsektore.
Kleynhans het ook aangevoer dat rasbeleid ekonomiese groei en werkskepping benadeel.
Hy het verder gewaarsku dat staatsverval en hoë vlakke van geweld, insluitend plaasaanvalle, vertroue in die land se toekoms ondermyn.
Kleynhans sê Solidariteit wil hê raswetgewing moet beëindig word, moedertaalonderrig en gemeenskapsinstellings beskerm word en dat selfbeskikking as ’n demokratiese strewe erken word.
