’n Stapper is veilig gered nadat hy op ’n ontoeganklike deel van ’n krans op Tafelberg vasgekeer geraak het.
Volgens Wildernis-soek-en-redding is ’n hommeltuig gebruik om met die man te kommunikeer en hom gerus te stel, terwyl reddingspanne na hom onderweg was.
’n Tegniese reddingspan het daarna byna 200 meter teen die krans afgeseil om die stapper te bereik.
Hy was ongedeerd en is met toue terug na veiligheid gelig.
Die organisasie waarsku stappers om hul roetes vooraf te beplan, genoeg water en ’n gelaaide selfoon saam te neem en iemand oor hul planne in te lig.
Mense wat in die berge verdwaal of beseer word, moet bly waar hulle is en so gou moontlik hulp ontbied.
