Die burgerregte-organisasie, AfriForum gaan Eskom se aansoek om ’n gemiddelde elektrisiteitstariefverhoging van sowat 8,8% vir 2027/28, teenstaan.
Die organisasie sê dit is onaanvaarbaar dat Eskom miljarde rand se wins rapporteer, terwyl verbruikers steeds met hoë lewenskoste en elektrisiteitstariewe worstel.
AfriForum sê elektrisiteitsverkope het met 6,2% gedaal, maar Eskom se inkomste het toegeneem weens hoër tariewe.
Die organisasie waarsku dat verdere verhogings verbruikers en ondernemings kan dwing om na alternatiewe kragbronne oor te skakel, wat Eskom se verkope verder kan laat daal.
AfriForum sal formele kommentaar by die Nasionale Energie Reguleerder van Suid-Afrika, Nersa, indien.
