Solidariteit skryf aan LUR oor SEB-sertifikate vir dokters

Die vakbond Solidariteit se doktersnetwerk het beswaar aangeteken teen die Gautengse departement van gesondheid se besluit om dienskontrakte vir mediese personeel te verander. Dié wysigings is van toepassing op medici wat by staatshospitale werk.

Volgens dié wysigings moet dokers nou as onafhanklike kontrakteurs registreer en sal hulle eers swartekonomiese bemagtigingsertifikate moet bekom alvorens hulle noodsaaklike mediese dienste kan lewer.

Hierdie kontrakte is glo jaarliks deur die Menslike Hulpbronne-departement hernu, maar dokters is onlangs per WhatsApp in kennis gestel dat hul kontrakte op 31 Maart vanjaar beëindig sal word.

Solidariteit beskou hierdie veranderinge nadelig vir ‘n reeds sukkelende gesondheidstelsel en eis duidelikheid oor die wetlikheid en arbeidsregtelike gevolge daarvan.

Die vakbond doen ‘n beroep op die departement om die maatreëls terug te trek en in gesprek te tree met die betrokke belangegroepe.