Die departement van onderwys in Gauteng het ’n begroting van R70,9 miljard vir die 2026/27-boekjaar ter tafel gelê, om knelpunte soos oorvol klaskamers en swak infrastruktuur te pak.
Die LUR vir onderwys in die provinsie, Lebogang Maile, sê dat Gauteng steeds een van die grootste leerlinggetalle in die land het, met miljoene leerlinge wat van die openbare stelsel afhanklik is.
“Die departement word deur enorme uitdagings in die gesig gestaar wat voortspruit uit vinnige migrasie, verstedeliking, oorbevolking, infrastruktuur-agterstande en groeiende leerlinggetalle, veral informele nedersetting- en binnestedelike skole,” sê Maile.
’n Beduidende aantal van die begroting is aangewend vir die verbetering van leerlinguitkomste in sleutelvakke, insluitend Wiskunde, Wetenskap, en Tegnologie.
“Nagenoeg R1,2 miljard word toegeken vir die verbetering van prestasie in sleutelvakke soos Wiskunde, Wetenskap, en Tegnologie.”
Maile sê dat dié ingrype daarop gemik is om vroeë kinderontwikkeling te versterk en hardnekkige leemtes in sleutelvakke te pak, aangesien dit leerlinge se vordering en toekomstige indiensneembaarheid beïnvloed.
