Die Vrystaatse departement van paaie het in ʼn voorlegging aan die infrastruktuur-portefeuljekomitee erken dat daar onderskeidelik R30-miljard en R15-miljard benodig word om teer- en grondpaaie in dié provinsie te herstel.
‘n VF Plus-lid van die provinsiale wetgewer in die Vrystaat, Armand Cloete sê dié bedrag is gelykstaande aan die totale begroting van die Vrystaatse regering vir die nuwe finansiële jaar.
Cloete meen die grootste deel van die provinsiale begroting word al jare lank aan maatskaplike departemente soos gesondheid en onderwys toegeken terwyl padinfrastruktuur aan die agterspeen suig.
Die provinsie het wel agtien paaie aan die Suid-Afrikaanse nasionale padagentskap (Sanral) oorhandig vir herstelwerk.
Hy sê die provinsiale departement van vervoer volg tans prosesse om nasionale rampbestuurfondse vir vloedgeteisterde paaie in die provinsie te verkry.
“Die VF Plus het in April vanjaar die departement van samewerkende regering en tradisionele sake (Cogta) versoek om grondpaaie in die provinsie as ʼn ramp te verklaar om die proses te versnel. Dit blyk egter dat die politieke wil ontbreek,” sê Cloete.
