Die Landbounavorsingsraad (LNR) het die groen lig gegee dat kommersiële farmaseutiese vervaardigers Suid-Afrika se entstof teen bek-en-klouseer mag produseer.
Dié besluit volg nadat voortdurende uitbrekings die nasionale vraag ver bo die LNR se eie kapasiteit laat styg het.
Volgens die Minister van Landbou, Willie Aucamp, sal lisensieooreenkomste geskikte plaaslike en buitelandse vennote toelaat om die noodsaaklike middels te vervaardig, terwyl die LNR intellektuele eiendomsreg behou.
“’n Vennootskap met die privaatsektor om die entstof deur die LNR te vervaardig, is ’n beslissende deurbraak in die beskerming van Suid-Afrika se veesektor, die versterking van nasionale biosekuriteit en die beveiliging van voedselvoorsieningskettings,” het Aucamp gesê.
Dié entstof word teen plaaslike stamme van die siekte gebruik en benodig ’n enkele jaarlikse dosis.
Lees meer: Kabinet tevrede met BKS-vordering
Volgens die LNR is hy steeds daartoe verbind om sy eie vervaardigingsvermoë te herbou en sal voortgaan om in bykomende produksiekapasiteit te belê.
Inkomste wat uit die lisensieooreenkomste verdien word, sal afgebaken word en spesifiek gebruik word om die LNR se entstofproduksiefasiliteite uit te brei.
Alhoewel die lisensiëringsproses en produksiereëlings tyd sal neem om te implementeer, het Aucamp die besluit as ’n belangrike stap in die rigting van die verbetering van die beskikbaarheid van entstowwe beskryf.
Die LNR sal in Oktober monsters van die virusse, na die Pirbright-instituut in die Brittanje stuur vir verdere ontleding.
Dié assessering sal ’n onafhanklike siening bied oor hoe goed beskikbare plaaslike en ingevoerde entstowwe waarskynlik sal beskerm teen die stamme wat tans Suid-Afrikaanse vee kniehalter.
