Die Suid-Afrikaanse Polisiediens het vandeesweek afskeid geneem van hul langsdienende vlieënier, luitenant-kolonel Jacobus Gideon “Div” de Villiers, wat ná 46 jaar se getroue diens aftree.
De Villiers het sy loopbaan in 1980 as konstabel begin en later gekwalifiseer as helikopter- en vastevlerkvlieënier.
Met 16 900 vliegure agter sy naam, het hy kritieke steun verleen tydens misdaadbestryding, reddingspogings en gevaarlike operasies.
Hy is onder meer in 2009 vir dapperheid tydens ’n gewapende transitoroof vereer.
De Villiers het oor die jare by die polisie se lugvleuel by Wonderboom-lughawe, met talle helikopters en vliegtuie gevlieg wat deur die SAPD gebruik is, insluitend die Pilatus PC-6 Porter, Pilatus PC-12, King Air C90, Cessna Sovereign-straalvliegtuig, MD500 D en die AS350 Squirrel, gevlieg.
De Villiers het ook talle loopbaanhoogtepunte, maar een wat veral uitstaan, was toe hy die geleentheid gehad het om lugvaart-opleiding in die Verenigde State van Amerika te ondergaan het, waarna hy ’n Cessna Citation Sovereign-straler teruggevlieg.
“Aan diegene wat ek agterlaat – onthou, elke opstyging het ’n doel. Of julle nou verdagtes agtervolg, na vermiste persone soek of beamptes op die grond ondersteun; as vlieëniers maak julle werk ’n verskil. Dit is ’n absolute eer gewees om die SAPD-kenteken te dra en my land met trots te dien,” het De Villiers gesê.
Die waarnemende nasionale kommissaris, luitenant-generaal Puleng Dimpane, het De Villiers as ’n lojale beskermer geloof wat ’n blywende nalatenskap vir die land se veiligheid agterlaat.
“Jou jare in die lugruim was meer as net vlugsendings. Jy was ’n betroubare beskermer wat talle polisiëringsoperasies, soek-en-reddingsoperasie, misdaadvoorkomingsinisiatiewe en noodoptredes ondersteun het. Jou professionaliteit, dissipline en onwrikbare toewyding aan jou plig het ’n blywende bydrae tot die veiligheid en sekuriteit van ons land gelewer,” het Dimpane gesê.
