Munisipaliteite wat Eskom saam meer as R100-miljard skuld het nog geen vordering gemaak om dié skuld te vereffen nie.
Die minister van elektrisiteit, dr Kgosientsho Ramokgopa, het dié nuus tydens ’n mediakonferensie in Johannesburg gedeel.
Hy sê wanbetalers het ’n ernstige negatiewe impak op die kragvoorsiener se inkomsteinvordering.
Eskom het onlangs ’n aggressiewer benadering aangeneem om te verseker dat munisipaliteite se skuld betaal word, maar ondanks die bevriesing van bankrekeninge en kragafsluitings bly die skuld aan Eskom toeneem.
Verlede jaar is die Emfuleni-metro se bankrekening bevries nadat hulle geen belangstelling getoon het om hulle skuld aan Eskom van R8-miljard te vereffen nie.
Die kragvoorsiener dreig ook reeds ‘n geruime tyd om dele van Johannesburg se kragtoevoer te sny weens uitstaande skuld.
Volgens Ramokgopa is hy ook bewus van die feit dat inwoners se skuld aan munisipaliteite meer as R300-miljard beloop.
