Die VF Plus sê die beloftes wat Mpumalanga se LUR vir finansies, Bonakele Majuba, in sy begrotingsrede vir die 2025/26-geldjaar gemaak het, is onuitvoerbaar weens die regering se “onvermoë om korrupsie te bekamp.”
Die VF Plus se provinsiale wetgewerlid, Werner Weber meen die provinsie sukkel om projekte soos die varsproduktemark en die prestasiesentrum af te handel, terwyl daar nie ’n duidelike plan is om die hoë werkloosheidskoers van 34,7% in die provinsie die hoof te bied nie.
Weber sê Majuba het in sy begrotingsrede ‘n provinsiale werkloosheidsyfer-teiken van 25% gestel. “Om dit te bereik moet die provinsie vir die volgende vyf jaar jaarliks tussen 50 000 en 60 000 nuwe en volhoubare werkgeleenthede skep.”
Weber sê hoewel befondsing vir toerisme verwelkom word, bly besteding aan projekte soos die Belfast-prestasiesentrum en ’n nuwe arena in Mbombela onaanvaarbaar.
Hy sê R111,6 miljoen word voorsien vir die instandhouding van natuurreservate, en R118 miljoen vir toerisme-ontwikkeling en bemarkingsinisiatiewe. Hy sê die VF Plus verwelkom bogenoemde aangesien toerisme die hart van die provinsie is. Plaaslike natuurreservate is in ‘n haglike toestand en wildstroping en -diefstal vier hoogty.
Die party eis dat geld eerder aan infrastruktuur en werkskepping toegeken moet word.
