Iranese amptenare het volgens ontleders aan diplomate in die streek gesê hulle is honderd persent seker dat die Verenigde State weer die land gaan aanval.
Die atmosfeer in Teheran word toenemend as dié van ’n naderende oorlog beskryf.
Iran se Revolusionêre Wagkorps waarsku dat ’n nuwe Amerikaanse aanval moontlik is en dat Iran se reaksie dié keer sterker sal wees.
Dit volg nadat president Donald Trump gedreig het dat die VSA se volgende optrede teen Iran ernstig sal wees.
Volgens CNN het die Amerikaanse weermag nuwe aanvalsplanne vir Iran opgestel, wat moontlik die gebruik van die GBU-43/B MOAB insluit.
Dit is die grootste nie-kernbom in die Amerikaanse arsenaal.
Die planne sluit moontlike aanvalle op Iran se energie-infrastruktuur en kernterreine in, indien president Donald Trump verdere militêre optrede goedkeur.
Die bom is tot dusver net een keer in ’n gevegsituasie gebruik, naamlik in Afghanistan in 2017.
Volgens berigte het Trump en Israel se premier, Benjamin Netanyahu, ook onlangs die moontlikheid van ’n groot nuwe militêre operasie teen Iran bespreek.
