Die aansteeklike hondevirus, Distemper, ook bekend as hondesiekte, is in Pretoria-Wes en dele van Pretoria-Noord bevestig.
Volgens ’n mediaverklaring van die DBV se tak in Pretoria kan die siekte honde se longe, ingewande, brein, oë en vel aantas en dit versprei deur middel van direkte aanraking, hoes, nies en liggaamsvloeistowwe.
Hoewel mense nie distemper kan kry nie, kan hulle die virus onbewustelik op hul hande, klere of items dra wat ‘n risiko vir onbesmette diere kan inhou.
Simptome sluit onder meer koors, afskeiding uit die oë en neus, braking, diarree, lusteloosheid en verlies aan eetlus in. Ernstige gevalle kan lei tot aanvalle, bewing, verlamming en selfs die dood. Daar is geen geneesmiddel nie, slegs ondersteunende behandeling is beskikbaar.
Troeteldiereienaars word aangeraai om hul honde se inentings teen hondesiekte en hondsdolheid op datum te hou.
