Die DA vra dat die parlement vandag dringend vergader om die komende brandstofprysverhoging te bespreek.
Die parlement is eintlik vir die week gesluit voor die Paasnaweek en sal eers weer op 21 April sit.
Die DA-LP Mark Burke het egter aan die Speaker, Thoko Didiza, geskryf en versoek dat ’n spesiale sitting gehou word oor dié saak van nasionale belang.
Die party sê dit is onaanvaarbaar dat die parlement sluit terwyl Suid-Afrikaners ’n skerp styging in brandstofpryse moet trotseer.
Intussen het die minister van finansies, Enoch Godongwana, gesê ’n kabinetskomitee ondersoek die uitwerking van die konflik in die Midde-Ooste en die styging in oliepryse.
Die DA glo egter die proses is te stadig en doen ’n beroep dat die brandstofheffings met 50% verminder word, wat volgens hulle ’n besparing van R3,16 per liter kan beteken.
