Walter Ernst
Australië se eerste minister, Anthony Albanese, het onderneem om alles moontlik te doen om anti-semitisme hok te slaan.
Dit volg op gister se aanval op Joodse feesvieringe by Bondi-strand in Sydney. Twee aanvallers, ’n pa en seun, het die Hannukah-fees geteiken waar meer as duisend mense byeengekom het. Dié aanval het tot die dood van vyftien mense, met nog veertig wat gewond is gelei. Albanese benadruk dat terreur nie in Australië sal seëvier nie.
’n Fondsinsameling is intussen van stapel gestuur vir die vrugtewinkeleienaar wat die heldedaad verrig het om een van die aanvallers te ontwapen, en wat self twee keer geskiet is.
Albanese het ook onderneem om die vuurwapenwetgewing op te skerp. Australië het reeds van die wêreld se strengste wapenwette, met slegs 31 wapenverwante moorde wat tussen Julie 2023 en Junie verlede jaar aangeteken is.
Fotokrediet: Dean Lewins/EPA
