Esmarie Yssel
Dis die tweede agtereenvolgende jaar wat Silverton in Pretoria op Kersvader se roetekaart vir spesiale besoeke is.
Inwoners, minderbevoorregtes en kinders van dié en omliggende woonbuurte gaan vanaand met harte vol afwagting in hul beddens kruip, omdat Kersvader môreoggend met twee vragmotors vol geskenkpakkies die strate met vreugde en Kersfeesgees gaan vul.
Die afgetrede plaaslike egpaar, Danie en Marietjie van Deventer staan aan stuur van dié Christmas Run – wat dit namens die Silverton/Meyerspark/Weavindparkbuurtwag tot uitvoer bring.
Hul woning is tans propvol sakke met sowat 3-duisend bederfpakkies wat names Kersvader gepak en gestoor word.
Die man met sy wit baard en rooi pak begin môre om 9:00 deur Meyerspark, Voëltjiedorp en Silverton – aan die bokant van Pretoriaweg – beweeg.
Die tweede vragmotor met nóg ’n Kersvader – dalk die ware een se ewebeeld – beweeg dieselfde tyd deur Weavindpark en Silverton – aan die onderkant van Pretoriaweg.
Daar sal by 20 punte gestop word, sodat ieder en elk om 16:30 met ’n groot glimlag huiswaarts kan keer.
