Die DA meen dat die provinsiale wetgewer in Mpumalanga nie by magte is om die Nasionale Krugerwildtuin se naam te verander nie, al probeer die EFF hóé hard.
Die DA se nasionale woordvoerder, Willie Aucamp, sê die wildtuin behoort aan SANParke, wat op sý beurt weer onder die departement van bosbou, visserye en die omgewing val.
Dié reaksie volg nadat die EFF ‘n mosie ingedien het om die Nasionale Krugerwildtuin en die Kruger Mpumalanga-lughawe se name te verander.
Die EFF se Rhulani Qhibi het vroeër gesê Erfenismaand is die ideale tyd om die name te verander en het voorgestel dat die naam na die Skukuza Nasionale Park verander word, terwyl die lughawe na David Mabuza vernoem moet word.
