Volgens Statistiek Suid-Afrika (SSA) se kwartaalsyfers was daar ‘n afname van 291 000 mense wat in die eerste kwartaal werk gehad het.
In die eerste drie maande van 2025 was daar amptelik 16,8-miljoen mense in die formele arbeidsmag – teenoor die 17,1-miljoen van die vierde kwartaal van 2024.
In dieselfde tydperk het die aantal werklose mense – wat ontmoedigde werksoekers uitgesluit het – met 237 000 tot 8,2-miljoen toegeneem. Ontmoedigde werksoekers het met 7 000 (0,2%) toegeneem.
Die veranderinge in indiensneming en werkloosheid het daartoe gelei dat die amptelike werkloosheidskoers met een persentasiepunt toegeneem het – van 31,9% tot 32,9%.
