Solidariteit, AfriForum en die Solidariteit Skoleondersteuningsentrum (SOS) sê die riglyne wat vir die BELA-onderwyswet gepubliseer is, is ‘n taktiese deurbraak vir dié organisasies.
Die riglyne is deur die minister van onderwys, Siviwe Gwarube, gepubliseer.
LEES OOK: Regsaksie begin oor promulgering van die Bela-wet
In ‘n gesamentlike verklaring sê hulle dat die riglyne nie die wet ongedaan maak nie, maar dat dit ‘n mate van beskerming vir skole bied.
Volgens die gepubliseerde riglyne mag skole – wat genoegsame aansoeke van ouers ontvang het – nie departementele instruksies ontvang om hul taalbeleid te verander nie.
Benewens dié bepaling word die konsultasieproses duideliker uiteengesit en word daar klem op faktore soos die skole se bestaande taalbeleid en die behoefte in die groter onderwysdistrik gelê.
LEES OOK: Bela is wet – wat nou?
Luidens die riglyne moet die reg op moedertaalonderwys ook in ag geneem word.
Die uitvoerende hoof van Solidariteit, dr Dirk Hermann sê hoewel riglyne minder gewig dra as regulasies, norme en standaarde, bied dit tog ‘n mate van rasionaliteit. Hy sê dit beteken dat as iemand dit nié toepas nie, daar ‘n sterker grondslag vir regsaksie is.
Die riglyne in hier beskikbaar.
One Response
Solidariteit, AfriForum en die Solidariteit Skoleondersteuningsentrum moet nie té gerus raak nie. Ons weet al die ANC kan nie vertrou word nie en moet deeglik dopgehou word sodat hulle nie een of ander verskuilde agenda in werking stel nie.