16 Januarie 2025
AfriForum, Solidariteit en die Solidariteit Skoleondersteuningsentrum het met regsaksie teen die promulgering van die Bela-wet begin.
Volgens dié organisasies was president Cyril Ramaphosa se optrede – om die wet in sy geheel te promulgeer – irrasioneel.
Hulle voer aan dat dit ook strydig was met verskeie ooreenkomste en ’n aanbeveling van die minister van Basiese Onderwys, Siviwe Gwarube.
Tydens ‘n mediakonferensie vanoggend, het dié drie organisasies daarop gewys dat die minsiter ook irrasioneel opgetree het deurdat sy die promulgeringskennisgewing mede-onderteken het.
Dit is glo teenstrydig met haar aanbevelings dat die wet nie ten volle gepromulgeer moet word nie.
Regsbriewe is reeds aan die president en die minister gestuur waarin hulle tien dae gegee word om die dispuut op te los.
Die partye sê hulle sal geen ander keuse hê as om die hof te nader indien daar nie reaksie op hulle skrywes is nie.
