Die regering beplan strenger wetgewing om onwettige mynbou en prospektering in Suid-Afrika die hoof te bied.
Voorgestelde wysigings aan die Strafproseswet en die Wet op die Ontwikkeling van Minerale en Petroleumhulpbronne kan boetes van tot R100 miljoen en tronkstraf van tot 30 jaar tot gevolg hê.
Die huidige maksimumstraf is ’n boete van R250 000 en tot tien jaar tronkstraf.
Die wysigings sal dit ook makliker maak om mense te vervolg wat onwettige mynwerkers help of bystaan.
Die regering sê die voorgestelde wetgewing moet ’n leemte in die huidige wet vul, aangesien verdagtes tans dikwels net vir oortredings soos betreding aangekla kan word.
