President Cyril Ramaphosa sê dat die volgende fase van Suid-Afrika se elektrisiteitshervormingsprogram op die vermindering van die koste van elektrisiteit moet fokus.
Ofskoon beurtkrag grotendeels iets van die verlede is, plaas buitensporige tariefstygings grootskaalse nywerhede soos die metaalsektor onder ernstige druk.
Volgens Ramaphosa het elektrisiteitspryse oor die afgelope twee dekades die inflasiekoers ver oorskry.
Ramaphosa het sakeleiers tydens die SA Federasie van Staal-en-ingenieursbedrywe se presidensiële besigheidsontbyt in Ekurhuleni toegespreek en die voortslepende uitdagings rakende lasvermindering in sekere gemeenskappe erken.
Hy beklemtoon dat toekomstige hervormings die sekuriteit van voorsiening moet balanseer met mededingende elektrisiteitspryse om industriële groei, belegging en werkskepping te ondersteun.
“Elektrisiteit moet bekostigbaar wees. Elektrisiteitspryse het vir energie-intensiewe nywerhede ’n eksistensiële uitdaging geword. Dit is presies die uitdaging. Oor die afgelope twee dekades het elektrisiteitstariewe baie vinniger as inflasie gestyg,” sê Ramaphosa.
Hy het bygevoeg dat elektrisiteitskoste in sommige gevalle veel hoër is as arbeidskoste.
“Dit noop smelters en ander energie-intensiewe bedrywighede om deure te sluit, wat tot grootskaalse werksverliese en die verlies van kritiese vaardighede lei. Dit is nie nywerhede wat vandag eenvoudig afgeskakel en môre weer begin kan word nie. Sodra ’n smelter sluit, verloor ons produktiewe kapasiteit in ons land”.
Ramaphosa het benadruk dat ’n betroubare kragnetwerk nie meer genoeg is nie – dit moet meer bekostigbaar wees om ekonomiese groei, belegging en werkskepping te verseker.
