31 Augustus 2022
Die veroordeelde moordenaar, Oscar Pistorius, het hom tot die hooggeregshof in Pretoria gewend om die owerheid te dwing om ‘n aansoek om parool vir hom aan te hoor.
Pistorius – wat as paralimpiese-atleet op die atletiekbaan uitgeblink het – dien tans 13 jaar gevangenisstraf uit vir die moord op sy voormalige vriendin, die model, Reeva Steenkamp.
In sy hofstukke voer Pistorius aan dat hy reeds in Februarie verlede jaar in aanmerking kon kom vir parool, nadat die hoogste hof van appèl beslis het dat sy huidige vonnis se datum van aanvang verander moet word na Oktober 2014.
In 2017 het dieselfde hof beslis dat Pistorius ‘n vonnis van 13 jaar en vyf maande gevangenisstraf moet uitdien nadat die staat teen ‘n vorige vonnis van ses-jaar appèl aangeteken het.
Die korrektiewedienste se Atteridgeville gevangenis – waar Pistorius aangehou word – voer op sý beurt aan dat daar teenstrydige uitsprake deur die hof is en dat hy ook ‘n hofaansoek afwag om duidelikheid oor die datums te kry.
